‘महाराष्ट्राची हास्यजत्रा’ या कार्यक्रमातून अनेक हरहुन्नरी कलाकार आपल्या जबरदस्त विनोदी शैलीनं प्रेक्षकांना हसवत आहेत. गौरव मोरे हे त्यापैकीच एक नाव.
हा कलाकार सध्या प्रेक्षकांचा लाडका ठरला आहे. मराठी नाटकं, चित्रपट, मालिकांत काम करण्याबरोबरच काही हिंदी चित्रपटांतही तो चमकला आहे.
एकांकिका, प्रायोगिक, व्यावसायिक नाटक त्यानंतर मालिका, चित्रपट अशा विविध माध्यमातून गौरव आपल्याला अभिनय करताना दिसतो आहे.
विनोदी भूमिका करण्याबरोबरच त्यानं काही गंभीर भूमिकासुद्धा केल्या आहेत. पवई फिल्टरपाडामध्ये राहणाऱ्या गौरवची सुरुवात त्याचा मित्र तुषार पवार याच्या सोबतीनं झाली. एकांकिकांमधून तो काम करायचा. एस के सोमय्या कॉलेजमध्ये असताना, एकपात्री स्पर्धा बघून त्याची सुरुवात झाली होती.
सोमय्या कॉलेजनंतर आंबेडकर कॉलेज आणि नंतर सीकेटी, पनवेल या कॉलेजमधून गौरवनं एकांकिका स्पर्धा, युथ फेस्टिव्हलमध्ये भाग घेतला. हे सगळं करत असताना ‘जळू बाई हळू’ या नाटकात अभिनेता आनंदा कारेकरचा बदली कलाकार म्हणून तो काम करत होता.
या नाटकात काम सुरू असतानाच प्रसाद खांडेकर यांच्या ‘पडद्याआड’ या एकांकिकेसाठी गौरव काम करू लागला आणि याच एकांकिकेमुळे त्याला नवी ओळख मिळाली. प्रसाद खांडेकरशी झालेल्या मैत्रीमुळे पुढे प्रसादनं लिहिलेल्या नाटकात आणि स्किटमध्ये गौरव काम करू लागला.
‘माझिया प्रियाला प्रीत कळेना’ या मालिकेतून त्यानं मालिकाविश्वात पदार्पण केलं. या मालिकेत तो विनोदी भूमिका करत होता. ही मालिका करत असताना गौरवचे वडल फार आजारी पडले. मालिकेचं काम सुरू असताना त्याच्या वडिलांचं निधन झालं. तरीही गौरवनं मालिकेतील त्याच्या भूमिकेवर परिणाम न होऊ देता, लोकांना हसवण्याचं काम सुरूच ठेवलं.
अनेक मालिका आणि चित्रपट करत असतानाही गौरवनं रंगभूमीशी आपली नाळ घट्ट जोडून ठेवली होती. प्रायोगिक आणि व्यावसायिक रंगभूमीवर तो काम करत होता. मराठी चित्रपट आणि मालिकेतील त्याचं काम पाहून हिंदी चित्रपटसृष्टीतूनही त्याला काही भूमिकांसाठी विचारणा झाली. ‘संजू’, ‘कामयाब’, ‘झोया फॅक्टर’ या चित्रपटातील त्याच्या कामाची वाहवा अनेक दिग्गजांनी केली आहे.
माझी या क्षेत्रातील सुरुवातच वेगळी होती. मी चार कॉलेजांमधून एकांकिका-नाटकांची उजळणी केली आहे. कुठेही थांबायचं नाही हे ठरवून मी काम करत राहिलो. पवई फिल्टरपाडा ते मनोरंजनसृष्टी या प्रवासात खूप चांगले-वाईट अनुभव आले. स्वतःला झोकून देत अभिनय करतोय. लोकांचं मनोरंजन करणं जमतंय की नाही ते माहीत नाही. पण, लोकांचं प्रेम मिळत राहणं माझ्यासाठी महत्त्वाचं आहे. तुषार पवार, प्रसाद खांडेकर, सचिन मोटे आणि सचिन गोस्वामी यांनी माझ्यावर दाखवलेल्या विश्वासाबद्दल मी त्यांचा ऋणी आहे.
